Vida xabaz

A la so edá tenía yá los güeyos ya'l corazón mui cansos y abenayá qu'utilizaba lentes y traxinaba adulces.
 
Otra nueche más, sele y con aquel güeyón rescamplando allarribones, baxó la tabla del escañu y entamanó les coses pa escribir. El candelabru, el tinteru, la pluma, los papeles... Y la compañía sele de los gárabos restallando nel llar encesu qu'arumaba con fueyes de lloréu.
 
Empezó a escribir otra vuelta les sos alcordances y conocimientos de la vida que llevare dende bien mozu. L'arcón u guardaba los sos escritos taba bien apináu de testos onde esplicaba abondes coses de los árboles, de les plantes y los animales domésticos y xabaces... Podía afirmase que naquel arca vieya de castañal pesllábase la so vida esmigayada en milenta esperiencies arrecoyíes al traviés de los años.
 

La xera de xuncir, la maña de cabruñar, l'arte d'ensertar, de curiar pumaraes y castañeos, de semar y recoyer, d'iguar truébanos, de llendar y catar... Milenta llabores esmuciéndose pel papel y dexando testimoniu d'aquella manera estremada d'afechiscar la so vida naquel requexu apartáu del mundu correctu, vixiláu, fayadizu y candial.
 

Porque la so vida pertenecía a otru mundu que se sumiere cuantísimayá, a otres dómines que nin los más vieyos recordaben, a otru xacer, a otru vivir, allugase, entamar... Un resclavu vivu de tiempos esfaraguyaos nuna historia tresmanada allá perlloñe.
 

Pero aquella nueche nun diba escribir de los sos conocimientos en nengún llabor. Coles vidayes teñíes pol blancor de los años, paecía-y yá'l momentu de dir amosando les sos esperiencies murnies nos xuicios onde lu condergaren, nes cárceles onde lu trancaren, los insultos y palices que davezu recibiere a lo llargo de la so vida por ser un inadaptáu a la modernidá, al progresu y sobre manera... al control.   

Y ye qu'enxamás nun-y perdonaren que viviere albentestate d'aquel gran güeyu protector que toles nueches achisbaba sollerte allá nel cielu. 

Que nun s'integrare nel engranaxe social, na sabencia programada, na tecnoloxía sagrada, nos principios incontestables. Enxamás,nenyuri, naide diba perdoná-y la so vida desapartada y xabaz, el so enfotu por nun ser una pieza más d'aquella maquinaria perfechamente vixilada onde la llibertá d'escoyeta y pensamientu pertenecíen al ferial del gran mundu de los suaños...

Duelu d'honor.

La pistola ye una preciosidá, miániques. Con incrustaciones de nácare na zona de la llave, nes plaques metáliques enriba'l gatillu... Ya los camafeos. Eses imáxenes d'una muyer, esculpida en marfil, que rematen per dambos llaos la pieza de fierro que cubre'l final de la empuñadura. Llegó a min cola llave en posición de carga y la cazoleta cubierta. Y, magar d'armes de fueu reconozo que nun entiendo gota, tamién ye bien cierto qu'estos artiluxos d'avancarga siempre tuvieron pa min, estéticamente, el so aquello.

Trescurrieren años y tamién xeneraciones dende'l día en que'l mio antepasáu la usare nun duelu. Sí, nun duelu. Por amor. Según la historia qu'aportare a min per tresmisión oral, la muyer de los camafeos yera l'amada d'aquel familiar de mio. Quixo la mala trampa qu'otru home-y faltare al respetu públicamente a la dama y, neses circunstancies, l'honor nun dexaba otru camín más que retalu a duelu. Y asina actuare l'antepasáu al que me toi refiriendo. Llamábase Don Fermín.

Dempués too trescurrió de manera estricta y siguiendo les normes pa estos casos. Escoyer día, llugar y hora. Conozo'l segundu datu. Decidieron vese nun claru d'una viesca nes afueres de la villa, anguaño terrén ocupáu poles instalaciones d'una esplotación minera abandonada. Escoyer padrinos. Llevar testigos. Don Fermín y l'home al que retare -nun llegaron a min el so nome nin el de la muyer pola que se batieren en duelu- garraron les pistoles revisaes polos padrinos. Too n'orden. Punxéronse espalda contra espalda y entamaron a caminar. Acabante dar los pasos estipulaos xiraron y apuntáronse. L'otru home disparó primero y a Don Fermín nun-y dio tiempu a facer lo mesmo porque se desplomó nel intre con un balazu metanes la frente.

La historia que me cuntaren acababa rellatando cómo l'amada del mio antepasáu marchare pa les amériques. El rastru del otru home sumiérase nel tiempu y la pistola fuere recoyida y perbién conservada hasta que, por aciu d'una serie de caramboles familiares, acabare na mio casa.

Confieso que, dacuando, gárrola y afalágola. Mírola y remírola. Porque, como dixi enantes, ye una auténtica preciosidá. Una xoya d'antigüedá coles sos incrustaciones de nácare ya los sos camafeos de marfil. Al final, la única semeya que queda de los protagonistes de toa aquella historia ye la de l'amada de Don Fermín inmortalizada nos camafeos. Y confieso tamién que, delles vegaes, éntrame'l rixu d'empobinar pa les instalaciones de la mina abandonada qu'hai nes afueres de la villa, da-y p'atrás a la llave y apretar el gatillu. Siempre tuvi duldes de si l'arma siguía cargada con aquella bala que'l mio antepasáu, difuntu naquel duelu d'honor, enxamás llegare a disparar.

Mieu

La nueche yera escura como boca de llobu. Colás enfilaba pa casa pela caleya coles boleres del gargüelu medio pesllaes pola medrana. Yera viéspora de Tolosantos y yá se sabe que nesta fecha anden los difuntos en danza y la Güestia de ronda.

La lluna empicipió a allumar como un candilín feble. De sutrucu, sintió como un ruxerrux pa contra'l bardial y vio unes bisarmes blancucies. ¡Yera la Santa Compaña de xuro!. Entós garró un palu de la sebe y fixo un círculu en suelu pa metese dientro y oxar asina'l peligru qu'achisbaba la so vida. Pegó un blincu, metióse nel redondel, y sintió como si pisare dalgo blanduzo que chiscaba y arrecendía. Al empar, dos solombres salieron a escape al traviés del prau. Abultó-y comitiva mui ruina pa una procesión de difuntos, pero... ¡coses de la ultratumba!.

Xunta la panerona de sos padres, Tuxa comentaba col so mozu Andrés la mala suerte que tuvieren:

-¡Rediola, nin!. Pa una vez que nos ponemos a trebeyar tranquilinos va pasar per ellí'l tochu Colás.

-Dígotelo yo, manti, colo afayadizos y calentinos que tábemos naquel requexín...

Cuando aportó a casa, Colás aguantaba como podía la recatafila que-y taba soltando la so muyer:

-¡La Güestia, sí!. ¡Y la pigorcia que traes tamién!. ¡De los coños col xostrón!. ¡Si nun anduvieres de pingu per ende p'acullá pela nueche, pimplando y candonguiando, nun triabes moñiques, rediós que non!. ¡Mira qué entafarre de cocina, gochonzón!. ¡Vas ponete a fregalo tu...!

Calentase ye bobada

-Nun convién calentase. Val más aposentar y razonar. Dixerir en frío les coses…- xuxuriaba Merchor Púmbala mientres cargaba’l trabucu y colocaba en cintu la cheira heredaos d'un antepasáu de so, famosu bandoleru, que morriere azafranáu a principios del sieglu diecinueve polos civiles que lu rondaben pelos montes de Ronda.

Y dempues añadió: “Con esta xente hai que se sentar a falar acordies. Eso ye”.

Llevaba doce multes en doce meses. Axuntaba sanciones de toa mena. Municipales. Autonómiques. Estatales. La so corexa quedare-y más esturniada qu’una pamesta  nel sable d’una playa.

Andaba tamién esgoncipliáu de salú y moralmente desfechu pola mor d'un viaxante de llencería que quixo la mala trampa que pasare un mal día pel edificiu onde vivía ofreciéndo-y a la so muyer les sos prendes y dexándola a cambiu prendada y prindada de corazón. Una nota escueta, cruel y contundente anunciába-y a Púmbala la despidida: "Marcho con otru. Adiós".

Dempués taba aquel caxón atarraquitáu de recortes de prensa onde anunciaben xubes a tente bonete. Que si la lluz. Que si’l gas. Que si la gasolina. Que si… estes tases, aquelles, les otres de per ende p’acullá…

Y, yá pa rematala, quedaba enmarcada na parede la notificación de la empresa onde trabayaba de que taba nel paru dempués de trenta y ún años dándoles toes y más. Aquel ábanu de llaceries raspiaba lo tristemente antolóxico. Dixéren-ylo los conocíos: “lo tuyo ye pa enmarcar, Melchor”. Y mialma si lo fexo, sí. Enmarcólo.

Rabiló un cachu más pel pisu, achisbó pela ventana, punxo la gabardina amatagando nella l'arma y salió a la cai empobinando pa la urbanización au moraben les monxures más empicorotiaes del mundu de los negocios y les finances dispuestu a escoyer interlocutor afayadizu col que "dialogar".

                                     (..................................)

El director de “Perresasgaya Y  Otros Chirimbolos Financieros Corporation”, H.uancho Money, andaba aquella temporada n’ayén. La idea d’atopar un trompetista pa la orquesta de swing que taba formando runfába-y pela cabeza como un abeyón. Xusto una selmana antes de la gran presentación morriére-y el trompetista que llamaben “El Flacu”. Un home que siempre fuere gordu y entamare diba tiempu a adelgazar hasta quedar casi esglamiáu. Cuando morriere enterárense que fuere de comer poco y esmolecese muncho de magar lu echaren del trabayu, del pisu y de la ponte so la que vivía.

Aquella mañana, acabada la xornada llaboral , H.uancho empobinaba pa casa a xintar. Llegó a la puerta del xalé y cuando diba meter la llave na pesllera sintió carpir detrás d’él. Voltió y nun yera pa creyer lo que taba viendo. Un individuu punxéra-y una trompeta mesmamente encloyada nes ñarres y reburdiába-y:

-¡La pasta, yá, darréu!. ¡Venga la pasta!.

-Home,  tenemos que lo falar reposao. Puedo ofrecete lo que diba cobrar “El Flacu”, pero primero tendrás que me demostrar que sabes tocar esa trompeta- contestó gayoleru H.uancho ante tanta fortuna inesperada, confundiendo nel so envizcamientu musical la boca'l trabucu con una trompeta plateada.

Melchor Púmbala taba desconcertáu dafechu. Nun entendía nada. Dáben-y ramalaes contradictories. Per nanosegundos petába-y aperrilla-y a aquel manguán, garra-y la cartera y xispiar. Y per segundos nanos inclinábase por azotar trabucu y cheira y colar llorando pa casa.

-¡Pero vamos ver, zoquete integral!, ¿nun ves que te toi atracando?…¡faltosu…!- glayó Melchor cutiéndo-y cola campana del arma nes narices a Money y poniéndose colloráu como un pitu de pura roxura.

Foi entós cuando’l financieru se zampó de la nube  na que llevaba viaxando tola mañana decatándose de la cruda realidá que taba a puntu de dexalu ensin ñarres y demás partes adosaes de la so cabeza. Nun reflundiu nun foi pa gorgutar otra cosa que:

-¡Tranquilu, hom...!. Oi... por casualidá... ¿nun sabrás tu tocar la trompeta?. Ye que... vamos debutar una orquesta de swing y morriónos el trompetista... y necesitábemos otru llueu y..., bono... pues eso… Podría pagate... ¡milenta y tantos! euros por sesión…

Al sentir aquella cifra, a Melchor abrióse-y un cielu tan escampláu de sópitu qu'hasta'l Nuberu fuxía dando coles pates sen culu, apartó’l trabucu, arremelló los güeyos, llimpió cola manga la gabardina unes babones que-y esquitaben a golfaraes pela boca, sintióse esnalar lleváu en pelondines per  aquellos sones casi escaecíos qu’interpretare cuantayá per milenta bodes y banquetes... Entós alendó fondo y púnxose él:

-Bono... yo fui trompetista d’una orquesta de swing reconvertida dacuando en pachanguera pa pañar daqué actuando en bodes y banquetes ayuri hai munchos años... Esperiencia sí que tengo, sí… Llamábamonos  "The Tachimba's Boys"...

Al sentir aquelles pallabres H.uancho amatagó un ixuxú en gargüelu pola increyible noticia de tener delantre d'él al trompetista que fixere esfrutar colos sos rebilicoques musicales a tolos invitaos... ¡de la so propia boda! nuna tarde-nueche memorables. Nun facía falta demostración musical nin más nada y ellí mesmo zarraron el tratu dándose la mano talo que dos tratantes de xatos pintos metanos la feria ganáu de Corao, allá per Cangues d'Onís.

Camín de casa, recién roblada la contratación de flamante trompetista de la orquesta de swing del  famosu director financieru H.uancho Money, un renacíu Melchor Púmbala diba reflexonado pa contra sigo:

“¡Cuánta razón llevaba yo!. Nun convién calentase. Val más aposentar y razonar. Dixerir en frío les coses… Con esta xente hai que se sentar a falar acordies. ¡Eso ye!".

Un creitu pa la bolera

Visto agora, en frío, que saliere aquel día del conceyu como xabaril escopetiáu valióme pa que nun m’azafranaren nel sitiu.

Ye bobada. Hai xente tan aquello que si te pones a argumentar con ellos ye neto que si t’escentellares escontra una peña. Das voces en castañéu y rinches como un carru. Yá se sabe qu’oyer y escuchar nun son lo mesmo.

Y yo intentar intentélo con brenga. Falé, di razones a embute, enfotéme y esparabanié pa da-yos más tiez a les mios pallabres, pero confiéseme cura, confiéseme flaire que per esa m’entra y pela otra me sal. Que nada, cho. Poníense a burbusar pelo baxo y a mirame de regüeyu y dempués nun me facíen nin plizca casu y namás que me contestaben que la mio proposición yera "imposible de llevar a cabu dafechu". Y puntu redondu.

Asina que cuando fui decatándome de que, ante la mio insistencia y enfotu, la xente empezó a mirame de llau, foíno, con cares gafes y xuxuriando una y otra vuelta ente ellos abultóme’l momentu afayadizu pa colar y poner tierra pel medio. Hasta me paeció ver a dalgún arregañar los dientes, apretar los puños y esbabayase como con ganes de faceme callar d'un enviyón.

Lo que más me fadia de too ye que los fechos diéron-yos a ellos la razón. Ye lo que pasa cuando dexes qu’el corazu apodere al xacíu, que pues meter el cuezu hasta atrás.

Poro, teo de reconocer que cuando traté de convencelos pa dir en xermandía encabezaos pol nuestru campeonísimu nel xuegu de los bolos camín del  bancu y pidir falar col director pa que nos concediere un creitu pa construir la bolera nueva taba equivocáu.

Pero non pola mor de la famosa crisis, les dificultaes pa llograr creitos y bla-bla-xu-xu, tema tristemente permansuñáu y de la mayor actualidá anguaño. ¡Ca!. Non. Too resultare ser abondo más cenciello.

 Simplemente  que yo daquella nun sabía que’l director de la sucursal yá s’enterare cuantayá que Pachu, el nuestru campeón indiscutible de cuatriada,  llevaba bien de tiempu acomuñáu cola so muyer y poniéndo-y entrambos a dos una cuerna más grande que la d'un venáu en plena berrea.

Y, claro, cuando m’empeñé en que fuere precisamente Pachu l’encargáu d'encabezar la comitiva pa pidir el  puñefleru creitu pa la bolera pues… que cásique me puñen… faltó poco… vamos, nada…

Motivación

Aquella mañana onde ponía'l güeyu allugaba'l banzón d'aceru. Nel concursu de tiru con gomeru, Vicente acertábales toes. Les bases teníen un aquello que les facía atractives pa él. Tirábase a unes lates de cerveza vacíes, y cada una que valtares yera pa ti en forma de lata enllena.

Y Vicente enxareyaba gomerazu tres gomerazu y lata tres lata. La xente plasmaba arreguilándose naquel fenómenu de la puntería. Los xueces del concursu mirábense con cara empapirotaos ante aquella exhibición. Al final, de diez tiros otres tantes lates llevaba con él de troféu, arriendes d'otres diez más de mampurra y d'una xarra de cerveza alemana policromada y con tapa metálica que-y correspondiere por ser el ganador.

Enxamás naide nun diba imaxinar que cuando practicaba na corrada de la so casa malpenes yera a raspiar una lata o un miserable tiestu colos que practicaba y mira que los tenía grandonos. Entrenando, Vicente yera malu hasta velo y dexalo.

Pero dempués de la descomanada demostración de puntería acabante  realizar nel concursu "Latina que tires, cervecina que bebes", quedaba bien claro que lo de so yera un cenciellu problema de motivación.

Un Home Gayasperu

Siempre fuere un home gayasperu pa coles muyeres. Gayasperu y bragueteru. Presumía de que nun hubiere moza a la que se cozcare y cola que nun consiguiere... l'aquello.

Pero como a los mozos galantiadores tamién-yos llega'l so samartín acabó casándose. Eso sí, cola moza más galana y que facía de naguar a tolos mozos de la rodiada. Y nun sólo se casó, sinón que tuvo hasta siete fíos con ella.

Esto tovía lu enchipaba más porque presumía de ser un sementalón pistonudu. Cuando se cruzaba con dalgún vecín dicía-y farrucón:

"Manín, l'ala de la montera y la minga d'un home tienen que tar siempre bien p'arriba".

Poro, una de les coses que más chocaben a un foriatu cuando aportaba al pueblu y conocía les andances ya'l potencial amorosu d'aquel auténticu gallu de la quintana yera que lu conocieren pela contorna col nomatu de: "el de los fíos del sacristán

El Güeyu La Ballena

Andrés fuere dende bien rapacín un cho de llancha nel puertu d'Entrellusa. La so familia siempre viviere de la pesca y de la caza la ballena dende los tiempos de los antiguos.

Aquellos díes taba nerviosu y con rebelgos nel butiellu. Yera normal. So padre prometiéra-y dexalu empuñar un arpón pela primer vegada nel siguiente avistamientu que vieren na mar. Hasta qu'aquella mañana hacia les once dieron voz dende la talaya de que columbraren un grupu ballenes soplando cerca la costa.

De sutrucu varies llanches echáronse a la mar. Nuna d'elles diba Andrés, dándo-y vueltes al arpón nes manes impaciente. Consiguieron aisllar a un exemplar. Yera raro, taba mui quietu, como flotando y esperando. Cozcáronse bien a él y Andrés púnxose arrechu arremangando l'arpón contra'l cetáceu.

Entós quedó como clisáu. Fixóse naquel güeyu argutu, serenu y triste con que la ballena lu miraba entientes. L'acorviar del restu la tripulación y un xiringón de so padre fíxolu esconsonar. Llanzó entós l'arpón y espetólu nel cuerpu l'animal xunto a otros más que-y aventaren dende les llanches. La ballena somorguióse y allá una vegada salió a flote cuspiendo un chorru sangre, agonizando. Lleváronla al puertu y entamaron el despiece p'aprovisionase de carne, saín, barbes, güesos...

Aquella nueche Andrés anduvo de velea. Tenía aquel güeyón que viere de la ballena como espetáu na mente y nun yera pa escaecelu. Al día siguiente siguió igual. Andaba como empapirotiáu, n'ayén, y nun atinaba a facer un llabor curiosu. Y asina les siguientes nueches y díes nuna enfilandrada interminable.

Col tiempu acabó dexando  Entrellusa pa dir a una casuca tierra adientro onde cultivaba una llosa y curiaba dalgún ganáu. Namás que de xemes en cuando baxaba al puertu a saliase pensatible o a echar l'anzuelu pa llevar dalgún pexe pa comer en casa. Y más nada.

Hasta qu'un día viéronlu sentáu pa la mano d'arriba de la rampla del puertu pela que xubíen les llanches pa reparar o protexer de la vagamar. Tenía en cuellu un güesu grande de ballena. Miraba pa la mar y poníase a dibuxar nél con una navaya como si copiare daqué que taba viendo allalantrones. Cuando-y entrugaben polo que taba faciendo, contestaba qu'un orniatu pa la tabierna onde se reunía la xente allá en Candás.

Una mañana poco antes del mediu día garró'l güesu y empobinó pa la tabierna. Hores dempués la xente arremolinábase xunta una paré. Ellí, aguantáu por dos gabitos, taba'l güesu dibuxáu por Andrés. Podía vese  Entrellusa, les llanches na mar, la ballena...

Y, sobre too, aquel güeyu descomanáu pal so tamañu real que, argutu, serenu y triste, mirábalos entientes.

La Llocura de Siora

Pachu llevárala a munchos médicos hasta que, por fin, dieren con un  tratamientu que paecía afayaizu pa la so llocura. Tantos años penitenciando coles sos tochures, con aquellos allorios, que talmente llegó a creyer que la teníen qu'ingresar en dalgún llau.

Y ye que Siora llevaba cuantisimayá viendo de too: cuélebres, xanes, trasgos, diaños burllones, nuberos, pegues falando, árboles xugando a les cartes... Pero quedaba too en casa y podía llevase. La cuestión entamó a enguedeyase enforma cuando-y dio por sentase darréu a la puerta casa a esperar pol esperteyón. Naguaba dende rapacina por esnalar y, por fin, diba poder facelo, pues un nuberu col que falare díxéra-y qu'esperare a la puerta que cualquier día mandába-y un nuberín a pasiala pelos aires guiando un esperteyu xigante con gafes... Y entós ella salía de casa y sentábase a la puerta fuere branu o iviernu, fixere fríu o calor. Y entós Pachu desesperábase...

Pero aquel día desgraciáu l'home tuvo que dexala sola y cuando tornó yá nun taba ellí. Pensó de too: que se perdiere na viesca y quedare pa los llobos, que la llevare dalgún mangullón, que zapicare dayuri cayendo a dalgún tabayón y escentellándose... Pachu sentíase alloquecer per momentos. Culpábase de dexala sola, de baxar la guardia, de ser un xostrón... Pensó hasta en suicidase él tamién, porque ensin ella yá nun quería vivir más pa nada... Entós picaron a la puerta. Abasando los pies foi y abrió. El médicu que trataba a Siora viniere a vela y a siguir cómo diba'l tratamientu y la malura. Pachu echó entós tolo que lu amburaba per dientro y esplicó-y  la gran llaceria que cutía'l so alma. El doctor escuchólu sollerte y silenciosu. Dempués faló:

-Nun t'esmolezas más, Pachu. Siora ta bien. Vila yo mesmu dando una revolada per ende montada nun esperteyón xigante con gafes guiáu por un nuberín. Saludóme y díxome que la esperare equí contigo, que tornaba llueu...

La Ferrería

L'agua del banzáu cayendo en tabayón movía'l machucu que cutía con un son constante. La fragua taba bien encesa y abarquinada. La yuncla amosaba les mozquetes de milenta forxes. Y la de güe yera una más que se diba perder somorguiada nuna riestra d'elles interminable...

Pel camín avanzaben dos homes pa contra la ferrería. Ún, de barbes blanques y llargues y de güeyos argutos, garraba al otru, que caminaba nerviosu y aforgugáu, per un brazu. L'home nerviosu avanzaba como zapicando y llevaba nes sos manes una caxa de madera ferrao. La puerta de la ferrería taba abierta y entraron.

-Equí vengo con esti home-dixo'l paisanu de los güeyos argutos.

-¿Trailo?-entrugó con indiferencia'l ferreru.

-Sí-tornó a responder el que traxere al home nerviosu-, tienlo nesa caxina de madera ferrao que lleva nes manes.

-Pues que me lo apurra y entamamos-dixo'l ferreru espurriendo pacia ellos una mano.

L'home nerviosu apurrió-y entós la caxina al ferreru que l'abrió y xuxurió xingando la cabeza afirmativamente:

-Bien, bien. Bramente ye mui guapu. Bultable, con bien de seches, bon material... Podemos facer un bon llabor con esto...

-Y ta en perfectu estáu. Empleguélu abondo y ta bien nidiu y nada ferruñentu pol usu, como usté podrá comprobar guapamente-atrevióse a tatexar l'home nerviosu.

El ferreru mirólu con un xestu de despreciu y nun-y contestó. Sacó de la caxa'l conteníu, calentólo na fragua y asitiólo sol machucu qu'entamó a cutilo hasta que foi camudando l'aquello nuna especie de baniella llarga y achaplada. Acabante d'iguar la primer parte del procesu, foi pa la fragua y la yuncla onde entamó a trabayar sobre la pieza hasta da-y la forma d'un arcoxu. Al acabar el trabayu, miró'l resultáu y sorrió:

-¡Bien!. ¡Yá tenemos otru más...!.

Dempués dio-y l'arcoxu al home de les barbes blanques que lu metió na caxina ferrada apurriéndo-yla al home nerviosu.

-Yá pues colar-espetó-y con voz arrestellada y segura.

L'home nerviosu, cola caxina otra vuelta nes manes coló entainando y ensin gorgutar.

Solos na ferrería, l'home de los güeyos argutos y el ferreru miráronse un ratadín entientes. Dempués, el ferreru faló:

-Yá tenemos otru pensamientu críticu achapláu y convertíu n'arcoxu pa torgar que puedan movese les idees llibremente.

-Pues sí, amigu ferreru, otru más- respondió con un biecu cómpliz l'home de los güeyos argutos-. Y van una carrapotada d'ellos nes últimes feches. Al ritmu que lleva'l negociu vamos tener qu'ampliar...

-Probablemente... probablemente...-afirmó'l ferreru llevando una mano al cazu mientres miraba como clisáu pela puerta la ferrería.

Allalantrón, l'home nerviosu malpenes yera un puntu casi qu'invisible, un llixu desapercibíu y insignificante, confundíu cola muga naquella tarde buxa...

La decisión d'Olaya

Por más qu'Olaya miraba y remiraba p'aquellos dos guirrios nun alcontraba nada pa estremar el que más-y gustaba pa mozu. So ma entrugáre-ylo milenta vegaes cuando la veía cortexar a dos bandes y a la xente xuxuriar peles llurigues:
  
-¿Cuál quies pa mozu, Olaya?.

Porque so aquelles melenes amazcarábense los dos pretendientes dende cuantayá de la rapaza y quedaren que pal antroxu ella diba decidise por ún de los dos ensin más tardanza. Pero como nun yera pa ello tampoco y yá-yos probecía a toos aquella escoyeta, escurrió la pretendida:

-¿Y por qué nun lo decidimos en viendo al que más salta?.

Paeció-yos a toos bien la idea. Fueron pal prau xunto a la llosa de Pepe Pachón y daquién comentó:

-Venga, el que salte penriba la vara yerba ye'l meyor, ¿acuéi?.

-¡D'alcuerdu!-vocinglaron ayuri.

El primer guirriu garró carrera, fincó la pértiga... y estampóse contra la yerba la vara un pocoñín más arriba de la metá.

El segundu entamó correr dempués, upóse nel aire algamando más altor que l'otru y... espetó coles piernes abiertes escontra la picorota'l palu tapada con un bote dexando ellí mancorniada la so entepierna. Dempués esnidió adulces pela yerba p'abaxo hasta quedar en suelu ximiendo ya iñando con un sonsón qu'asemeyaba'l cantar d'un carru.

-L'asuntu ta resueltu-comentaben los vecinos-, saltó más el que s'escentelló contra'l palu. Yá tienes mozu, Olaya.

Y asina quedó la cosa, cola rapaza cozcada al llau d'aquel mozu que taba espatarráu cabo la vara yerba glayando y retorciéndose como un esculibiertu. Dicen los últimos que la vieron que taba pálida y moviendo la cabeza negativamente cuando lu vio tan aquello.

Dempués too trescurrió de lo más corriente. Vieno'l casoriu. Una vida matrimonial colos sos bonos y malos momentos como toes...

Y los ximielgos. Porque ella ya'l so home tuvieren un par de ximielgos qu'apadrinare'l collaciu guirriu del maríu, que perdiere a la moza cuando los saltos,  que lo cortés nun quita lo valiente. Asina que los guah.es crecieron, escutruxaron y fixéronse mozos.Tamién cola mocedá entró-yos el rixu polos guirrios y los saltos heredáu de so pa y so padrín...

Foi entós cuando esa mala xente picuscayu que namás que sabe andar tol día marmurando y sopelexando bilordios entamóla cola muyer, l'home, el padrín y los ximielgos... Y too porque cuando los rapazos diben al prau xunto a la llosa de Pepe Pachón a practicar saltando la vara yerba nunca nun yeren a pasala. Pero tampoco nunca nun yeren a algamar el bote que cubría'l palu. Porque siempre acababen estampándose contra la yerba la vara un pocoñín más arriba de la metá...

Grandes guerreros.

Duldar que yéramos grandes guerreros yera bobada. Y que veníamos d'una pernomada triba de cazadores más bobada tovía.

Aquella tarde díbamos de caza. Fiximos una bona poza. Dempués mexemos allá, echemos cuchu, estrapayemos cabezones, echemos tola porquería qu'atopáremos perende y más y hasta dalgún baxó los pantalones y dexó ellí la so aportación más íntima. P'acabar, tapémosla con procuru. Namás que quedaba esperar pola presa.

Amataguémonos escucando a ver qué cazábamos. Tino frotaba les manes y too de los nervios y la emoción. De sutrucu, sentimos ruíu. Acercábase daquién. Yera la madre de Tino precisamente. Aportó a l'altura la trampa y ¡zas! metió la madreña hasta'l todiellu sacándola entafarrada de puxarra que daben hasta ganes de vomitar.

La sabia intuición d'una madre fixo'l restu:

-¡Tinoooo, ven p'acá que voi frayate!

Les ñalgaes restallaben na culera de Tino como voladores. Los demás guerreros esnidiémonos selequino pa fuxir d'una panadera segura.

Yéramos grandes guerreros, yera bobada duldalo. Pero non suicides.

La Machorra.

Serrano viniere del otru llau de les montañes, au s'espurre la meseta, buscando ameyorar la so vida. Alcontrare trabayu y vivía nuna casuca que llograre alquilar a les afueres de la ciudá. Yera bon rapaz y cumplidor nel tayu.Taba solteru, nun yera mal paecíu y la xente, yá se sabe, nestos casos marmura y fai conceyucos pa igua-y la vida al que, a lo meyor, nun tien gana nenguna d'andar en caxigalines.

El casu ye que los vecinos taben enfotaos en busca-y moza, porque víenlu siempre sólu o con amigos y entráre-yos el rixu de ver la posibilidá d'afitar la población de l'aldea y, de pasu, aumentar la tasa natalidá que-yos diba venir como aniellu al deu. Y pa bona moza y afayadiza Rosina: roxa, fecha y perfecha, formal y trabayadora. Tou un chollu.
 

La cuestión ye qu'a Serrano la rapaza facía-y rebusquinos y prestába-y cozcase a ella. Y, pa detrás, como los vecinos taben tol día afalándolu colo d'echar moza yá andaba él medio animaducu. Hasta qu'un día quixo la desgracia qu'oyere aquella pallabra maldita que-y esbarrumbare tol so enfotu en Rosina. Diba vela a so casa, cuando sintió a dalguna xente pal prau d'atrás como acorviala diciendo:
 

-¡Rosina, yes la reina de les machorres!. ¡Yes una machorra col pelo roxo, rapaza!.
 

¿Rosina una machorra?. ¿Un pericón con sayes?. Serrano nun quería creyer lo que sintieren les sos oreyes, pero oyéralo bien claro. La moza que-y xiringaba les coraes yera conocida como una machorra por tol mundu y hasta-y lo gritaben ensin disimulu...
 

Aparráu y gachu dexó'l pueblu aquel, despidióse del trabayu, y coló ayuri, perlloñe, a refacer aquella vida de so, apocayá esperanzada, y que se-y fuere pel sumidoriu nun Xuasús me valga.
 

Al final de la temporada, el diariu "Anuncies Deportives" daba la noticia de que l'equipu "Los Lleones de Pumarín", con un xuegu maxistral cola machorra de la so estrella Rosina Cienfuegos, ganaren el campeonatu d'Asturies de liriu.

Una truena inoportuna.

Nacíu nun bierzu de casona rural fidalga con piedra d'armes, torre y reconocíu ringorrangu, Don Rodolfo de Casielles y Barganiza sintiere un enclín descomanáu por solmenar cuchiellaes dende mui rapacín. Asina, cada vez que s'enteraba qu'en dalguna antoxana de l'aldea diben facer un samartín, xispiaba p'allá col envís d'adiestrase nel aquello de corar.

Espoxigó faciéndose bon mozu y afondando na so querencia combativa. Poro, mientres los mozos aldeanos de la so edá tresalecíen por andar de candonga pelos filandones y andeches, Don Rodolfo desamaba camín de la primer batalla qu'hubiere. D'esta miente, embutíu nuna armadura y xubíu nel caballu, repartía tayaes a magüeyu dando bona cuenta de cualquier enemigu que se-y punxere per delantre. Tal sonadía llegó algamar pente les tropes enemigues que los soldaos del exércitu contrariu procuraben evitalu metanos el combate.

El casu ye que la mañana del día d'aquella batalla, la más importante na que participare hasta entós y na qu'estrenaba cruz de la orden de Santiago, amaneciere soleyera, primaveral y con un airiquín que ximielgaba les banderes y pendones como afalagándolos. Entamada la griesca, Don Rodolfo, afayábase enfotáu aperrillando espadazos a tolo que se ximielgaba. Envizcábase de tal manera qu'hasta la propia soldadesca del so bandu guardaba con él una distancia prudencial pa nun dar coles sos cadarmes en suelu. Y cuenten que'l  fidalgu combatiente entraba en tal éstasis qu'hasta zarramicaba dacuando los güeyos mientres tarazaba equí y allá.

Foi precisamente alcontrándose nesta especie de trance guerreru cuando pasó daqué que lu desconcertó enforma. Sintió tronar ayuri y de siguío xarazar. Molestu miró pal cielu y comprobó  que siguía faciendo un día preciosu y escampláu pal combate. Nun entendía nada. De sutrucu, sintió daqué que-y cutía na coraza. Dempués observó axorizáu cómo-y salía un chirlotu de sangre del mesmu pechu que manchaba les clines del so caballu. Entamó a amoriar y zampóse de la montura en suelu ensin ser a pescanciar qué rediós taba pasando ellí ya inorando dafechu que'l progresu taba faciendo galanes, naquella xornada, nel vieyu arte de la guerra.

Ayudáu por un par de soldaos que lu arrecostinaron quitándo-y la celada pa qu'espansionare y alendare, Don Rodolfo apapiellaba arremellando los güeyos mientres daba les boquiaes tratando d'interpretar lo que-y asocediere echando mano de la única esplicación posible qu'atopaba rebuscando nel so mundu conceptual mamáu allá nel entornu rural onde se criare.

-Pero... ¿cómo...ye...posible que'l... nuberu...apruciere na...batalla... cola... truena...el xarazu...valtándome...con un rayu...nun...día tan gloriosu...como... güe?

Naide nun intentó comenta-y nada. Nun pagaba la pena ponese a esplica-y a aquel home, avezáu a les armadures y los fierros, que sintiere atroneyar pela primer vez na so vida les descargues d'un batallón d'arcabuceros. De dalguna manera, lo qu'asocediera aquel día na contienda podía resumise, na xíriga del honor del fidalgu que finaba, como la llaceria y la mala trampa d'una truena inoportuna.