De nada nun valió l'enfotu que punxera al contalo en chigre. Nin tampoco qu'amosara aquella cruz de plata. Toos lu tomaron a risión y hasta dalgún-y suxirió que bebiere menos si nun quería esgonciar el fégadu y acabar camín del siquiatra.
Xuan Pamplines yera un superviviente. Un vagamundu que diba apañándose percorriendo llugares y ofreciéndose pa facer un poco de too. Llevaba un tiempu afincáu na capital quirosana de Bárzana, onde llegare de Cangas del Narcea. Igual ayudaba a la yerba, qu'iguaba una cañería o reparaba una persiana. Y lo mesmo cobraba en dineru que n'especie.
Ello foi qu'una mañana empobinó pa Fresneo. Llamáralu un matrimoniu yá mayor pa que-yos pintare'l techu d'un cuartu, que nun taben ellos n'edá d'andar engolándose n'escaleres y tal. Aportó ceo y púnxose a la xera dexando'l techu pintáu bien curiosu. Como pagu apurriéron-y una pamesta de pan d'escanda y un tarru cristal con queisu de bota. Too ello tresnao en casa.
Cuando tornó pa Bárzana tiró pal chigre a echar unes pintes antes de dir a xintar. Papó unes cuantes y yá un poco chispu y gayasperu enveredó pa casa. Púnxose a xintar untando rebanaes del pan col quesu que-y dieren en pagu'l matrimoniu de Fresneo. P'amugar el gargüelu sacó un par de botellines de vinu cangués que traxera cuando pela seronda anduviere pellí a la vendimia. Saborgaba adulces cada bocáu d'aquellos manxares y cada sorbu de vinu zarramicando los güeyos y too. Taba prestando-y a embute aquello...
Pero foi cuando diba echar l'últimu vasu de la segunda botella de vinu cuando empecipió a sintir unos calores que-y diben dende les dees a la cabeza. Los güeyos veíen les coses como si esproñasen sobre elles estrellines de collores. Y somorguióse nuna esperiencia mística qu'enxamás diba escaecer na vida. Tando en plenu trance, sintió que s'elevaba del suelu. ¡Llevitaba!. Trespasó'l techu de la casa como si'l so cuerpu camudare en daqué inmaterial y entamó a ascender p'allarribones. Mentes flotaba nel aire, vio cozcase-y una muyer afatada de monxa.
-Hola, Xuan Pamplines, soi Santa Teresa de Xesús.
Xuan resfregó los güeyos pa convencese de que la visión yera real. Dempués púnxose a echar una rocada cola santa, que-y recitó tamién dalgún de los poemes qu'iguare en vida. Pa despidise, quitó una cruz de plata que llevaba al piscuezu y apurrió-yla a Pamplines mentes-y encamentaba:
-Esto ye un regalu que te faigo pa que te protexa del pecáu y les zunes allá abaxo nel mundu vanu y carnal de los vivos.
De siguío, Xuan Pamplines escomencipió a amiyar pa casa. Volvió a trespasar como si tal cosa'l teyáu y aterrizó adulces na cama onde quedó dormiendo y roncando como un benditu.
Cuando despertó recordó tola esperiencia mística que viviere y comprobó que tenía en puñu la cruz de plata que-y regalare la santa. Falto-y tiempu pa entainar pal chigre a contalo too a los parroquianos, pero ¡ca! nun-y fixeren casu dalu. Namás que tomalo too a xirigoncia y recomenda-y que bebiere menos o que fuere al lloqueru.
Pero Xuan yera neciu y encerriscáu. Nun diba dexar qu'un fechu tan trescendente quedare nel olvidu. Asina que nes selmanes siguientes, cuando atopaba a daquién, nun paraba de da-y la lata col asuntu de la so esperiencia mística y metía-y pelos focicos aquella cruz de plata. Asina que los collacios empecipiaron a esmolecese pola so salú. Pensaron qu'una manera d'ayudalu yera dir con él pa Uviéu, onde había un anticuariu mui espertu que podría abri-y los güeyos nel tema de la cruz de plata y, de pasua, entamar a desengudeyalu d'aquella obsesión.
D'esta manera tres amigos convencieron a Xuan Pamplines pa dir a ver al anticuariu. Cuando aportaron al so negociu, amosáron-y la cruz de plata. L'espertu miróla y remiróla. Echó mano d'un par de llibros y tuvo consultándolos. Dempués garró un frascu con llíquidu y frotó'l reversu y con una llupa tuvo agüeyándolu. Al final, dio-yos la so opinión:
-Esta cruz de plata ye del sieglu XVI. Y la inscripción del reversu...¡mialma, tien ustén un oxetu de valor que paga la pena que conserve!. Prestaríame compra-yla si alcordamos nel preciu...
-Non, gracies, tien pa min un valor inestimable y nun-y la puedo vender- respondió Xuan a la ufierta l'anticuariu.
Cuando salieron del negociu tiraron pa un restaurante col envís de xintar. Mentanto taben faciendo tiempu na mesa, Colás,un de los tres amigos que lu acompañaben pidio-y a Xuan que-y dexare un momentu la cruz de plata.
-¿Qué ye lo que tendrá escrito nel reversu?. Igual la fecha en que la fixeren...Antigua sí que ye, Xuan, eso nun te lo podemos ñegar. ¡Pero, hom, dexa yá'l riquirraque de la esperiencia mística que vas alloriar...!.
Xuan apurrió-yla. Colás miró'l reversu y emprimó a ponese pálidu mentes un sudu fríu-y esbariaba pela frente. Foi pasándola a los otros dos amigos y reaccionaron igual. Pálidos, sudando y clisaos. Cuando la volvió a garrar Xuan y la miró reaccionó con tola normalidá, pues la inscripción del reversu nun ponía nada qu'el nun supiere y llevaba encamentándolo cuantayá: "Teresa de Xesús".
